الرئيسية
أحدث الصور
من الرائع جدا انك تغلط وتصلح غلطك بنفسك قبل ما حد يقولك عليه واللى رائع اكتر منه انك ما ترجعش للغلط ده تانى ممكن اننا نرجعله تانى بدون قصد او بدون ما ناخد بالنا لكن مجرد المحاوله انك ما ترجعلوش تانى ده شىء عظيم لانك ناوى انك ما ترجعش للغلطه دى تانى لكن احنا بشر وممكن نغلط تانى وتالت وعاشر......بس المهم انك تحاول على قد ما تقدر انك ما ترجعلوش تانى عشان تفضل دايما فى نظر الناس انسان محترم والناس تاخد بالها انك من النوع اللى بيحاسب نفسه بنفسه ويحاول دايما انه يبقى بكره احسن من النهارده واحسن من امبارح لغايه ما يوصل للصوره المثاليه او الصوره اللى هو يحس انه راضى بيها واللى يحس ان الناس من حواليه راضيه عنها جدا .........فعلا لو كل واحد فينا حاسب نفسه بنفسه وصلح من اخطائه من غير ما يستنى ان الناس هى اللى تقوله على عيوبه واخطائه اكيد بجد هنحس بنتيجه ايجابيه وهنتقدم ....اما بقى الانسان اللى يبقى عارف عيوب نفسه وعارف انه غلط مع اى حد من اصحابه او اى حد يعنى وما يعاتبش نفسه وما يصلحش من نفسه ده اكيد الناس هتكره وهتبعد عنه لانه ما حكمش ضميره فى افعاله وبالتالى هيفضل دايما فى صوره سيئه قدام الناس .دلوقتى فى حاجه بقت موجوده فى كتير من شبابنا وهى الجرأه واقصد من الجرأه حاجات كتير يعنى مثلا ماشى فى يوم مع اصحابه فى الشارع اللى هو ملك للناس كلها وبتمر منه ناس كتير , ويقوم يهزر بصوت عالى مع اصحابه ويشتم شتايم الناس اللى ماشيه ما لهاش ذنب انها تسمعها وتلاقيه مش هامه الناس اللى معديه دى ولا اى حاجه كأن الشارع ده مثلا ملكه هو وبس ويعمل فيه اللى هو عاوزه من غير ما حد يكلمه واللى يزعل اكتر بقى انه مفكر انها كده رجوله وبتاع وانه كده بقى الواد اللى مقطع السمكه بقى وما فيش زيه مع انه لو فكر فيها شويه هيلاقى انها خيابه وكلام فاضى وتشويه سمعه ليه وللاسف لاهله كمان لان الناس هتقول انه ما لقاش حد يربيه ودى ابسط كلمه هتتقال ..... انا هسأل سؤال للناس دى واقولهم هل زى ما انت كده جرىء وبتتصرف التصرفات دى فى مكان عام زى الشارع مثلا هل بقى عندك الجرأه اللى تخليك تعمل كده فى بيتك وقدام اهل بيتك , اكيد طبعا لا لانك مش عايز مثلا اخواتك الصغيره يسمعوا كلام قبيح ويتعلموه منك , طب ما الشارع ده بيمر منه اطفال صغيرين برضه وممكن يتعملموا منك ويسمعوا منك الكلام ده ويبقى ساعتها ذنبهم فى رقبتك ... وبعدين اللى ما ترضهوش على نفسك وعلى اخواتك برضه لازم ما ترضهوش لالخوانك فى الشارع او فى اى مكان ... وموضوع الجرأه اللى جد علينا ده مش بس مع اصحابنا لا ده كمان بقى مع كل الناس حتى الكبار فى المدارس والجامعات وخلافه يعنى ممكن تبجح وانا اسف على الكلمه مع اى حد وما يهمكش وتقول كمان انا عملت ايه 
. وبالتالى الموضوع ده بقى مهم اوى اننا نناقشه وناخد بالنا منه لانه بيحصل فى كل حته ومع اى حد فلازم نكون احسن من كده شويه عشان بلدنا تفضل بخير وتفضل طيبه بأهلها وناسها وشبابها اللى هيجى فى يوم ويدافع عنها ويشيل مسئوليه تقدمها بين الدول كلها فلازم نكون ارجل من كده شويه عشان نقدر على المسئوليه دى وما نجيش فى يوم ونتخلى عنها وننسى انها قدمتلنا كتير .
. وبالتالى الموضوع ده بقى مهم اوى اننا نناقشه وناخد بالنا منه لانه بيحصل فى كل حته ومع اى حد فلازم نكون احسن من كده شويه عشان بلدنا تفضل بخير وتفضل طيبه بأهلها وناسها وشبابها اللى هيجى فى يوم ويدافع عنها ويشيل مسئوليه تقدمها بين الدول كلها فلازم نكون ارجل من كده شويه عشان نقدر على المسئوليه دى وما نجيش فى يوم ونتخلى عنها وننسى انها قدمتلنا كتير .
